كلام في السياسة

شعر صلاح جاهين

ماليش كتير في السياسة
لكن بفكر
وماليش كتير في الكلام لكن بعبر
من قلب مليان حماسة
وبقول كلام في السياسة

باحلم تتملي بالسعادة والأمان
بأحلم أعيش من غير ما اخاف غدر الزمان
وان جيت ونلت المنى
يصعب عليا الهنا
من غير ما يتهنوا حميع الناس كمان
ما اسعدش غير في وطن سعيد من حواليا
سموا الشعور دة حب ولا اشتراكية
ما ليش كتير في السياسة

أوقات أحس كأني على مفرق طريق
أحتار ويصبح قلبي في الأفكار غريق
ولما اشور الجيران
وأشاور خلان
رأي الصواب يظهر جرئ وله بريق
وأحس رأي حبايبي بينور عينيا
سموا الشعور دة حب ولا ديموقراطية
ماليش كتير في السياسة

بيني وبين أيامي حرب متنتهيش
وزي كل الناس باموت علشان أعيش
أتمنى أروح عندهم
جهدي على جهدهم
يصبح وجودنا قوة بعد ما كان مفيش
وأنا إيش أكون وحدي لولاش بلدي عليا
سموا الشعور دة حب ولا تعاونية
ما ليش كتير في السياسة

أنا قلبي مليان حماسة
لكل شئ حر صادق
ماليش كتير في السياسة
لكن بحب المبادئ
وبحب صاحب المبادئ

قصيدة للشاعر الكبير صلاح جاهين